જેલમાં બંધ પાકિસ્તાનના પૂર્વ વડાપ્રધાન ઈમરાન ખાનની પાર્ટી દ્વારા કરવામાં આવેલ વિરોધ ઈસ્લામાબાદ પહોંચતા સુધીમાં હિંસક બની ગયો છે. ઈમરાન સમર્થકો સાથેની અથડામણમાં છ સુરક્ષાકર્મીઓના જીવ ગયા અને 100થી વધુ ઘાયલ થયા. પાકિસ્તાનની કેન્દ્ર સરકારે રાજધાની ઈસ્લામાબાદમાં પોતાની સેના તૈનાત કરી છે. ઈમરાન સમર્થકોને જોતા જ ગોળી મારવાના આદેશ આપવામાં આવ્યા છે. બીજી તરફ ઈમરાન ખાનના સમર્થકો ઈસ્લામાબાદના કેન્દ્રમાં પહોંચી ગયા છે.

દેખાવકારો ડી ચોક પહોંચ્યા

જિયો ન્યૂઝ અનુસાર ઈમરાન ખાનના સમર્થકો ડી ચોક પહોંચી ગયા છે. ડી ચોક ઇસ્લામાબાદનો ખૂબ જ મહત્વપૂર્ણ વિસ્તાર છે. તેની આસપાસ રાષ્ટ્રપતિ ભવન, પીએમ ઓફિસ, સુપ્રીમ કોર્ટ અને સંસદ ભવન આવેલું છે. ઈમરાન ખાનની પાર્ટીના નેતાઓનું કહેવું છે કે જ્યાં સુધી ઈમરાન ખાન મુક્ત નહીં થાય ત્યાં સુધી તેઓ ઈસ્લામાબાદમાં જ રહેશે.

બુશરા બીબીએ સમર્થકોને સંબોધિત કર્યા

ઈમરાન ખાનની પત્ની બુશરા બીબીએ સમર્થકોને સંબોધિત કર્યા હતા. તેમણે કહ્યું કે જ્યાં સુધી ઈમરાન ખાન પોતે અહીં આવીને આગળની રણનીતિ જાહેર ન કરે ત્યાં સુધી તેઓ અહીંથી ન હટે.

ગૃહમંત્રીએ કર્યો મોટો દાવો

ગૃહમંત્રી મોહસિન નકવીએ દાવો કર્યો કે કોઈને પણ ડી-ચોક સુધી પહોંચવા દેવામાં આવશે નહીં. તેમણે એમ પણ કહ્યું કે સરકારે પીટીઆઈ નેતાઓને દરેક સંભવ રીતે સમજાવવાનો પ્રયાસ કર્યો.